Þjálfun
BATTAR hafa rekið einkaþjálfun í knattspyrnu í meira en 10 ár. Við sérhæfum okkur í nákvæmni sendinga og móttöku á bolta, umhverfisskynjun leikmanna og hraðri og réttri ákvarðanatöku. Við höfum þróað æfingakerfi okkar mikið á þessum tíma, en þrátt fyrir það þá erum við að vinna með sömu grunnæfingarnar og í upphafi. Það er vegna þess að við vitum að þær virka og gera iðkendur okkar betri í grunnþáttum knattspyrnunnar. Þjálfarar BATTA leggja mikinn metnað í þjálfunina, að hún sé einstaklingsmiðuð og sníða æfingarnar að getu hvers og eins iðkanda. Rík áhersla er lögð á jákvætt og uppbyggilegt andrúmsloft á æfingum, sem ýtir undir og styrkir sjálfstraust iðkenda.
Einkaþjálfun
Í einkaþjálfuninni er megináhersla lögð á sendingar, fyrstu snertingu og móttöku á bolta. Framkvæmd, nákvæmni og hraði sendinga, móttaka og fyrsta snerting á bolta, rétt beiting hægri og vinstri fótar, líkamsstaða við móttöku og sendingu á bolta eru meðal þeirra fjölmörgu atriða sem lögð er áhersla á í þjálfuninni. Auk þessa leggjum við mikla áherslu á að bæta umhverfisskynjun leikmanna og hraða og rétta ákvarðanatöku þeirra.
Iðkendur í endurhæfingu
Einn af leiðinlegum fylgifiskum knattspyrnunnar eru meiðsli.
BATTAR bjóða upp á þjálfun sem er tilvalin fyrir leikmenn sem eru að stíga upp úr og jafna sig eftir meiðsli en vilja halda sér á tánum. Í henni eru æfingarnar sniðnar að þörfum, ástandi og stöðu leikmanns í bataferlinu. Álagið er síðan aukið hægt og bítandi eftir því hvernig bata leikmanns fleygir fram.
Ánægðir viðskiptavinir
Tilvitnanir.
“BATTAR eru frábærir fyrir alla aldurshópa. Skemmtilegar og fjölbreyttar æfingar sem hjálpa manni mjög mikið tæknilega. Èg bætti snúninga, sendingar og fyrstu snertinguna mikið eftir að èg byrjaði að æfa hjá þeim. Èg mæli klárlega með þessum æfingum fyrir alla sem vilja bæta sig sem knattspyrnumenn.”
„Frábærir þjálfarar sem ná vel til barna og unglinga. Þjálfunin er mjög uppbyggileg og leiðsögn á æfingum framúrskarandi. Ég hef verið með þrjú börn í þjálfun hjá BÖTTUM og þau hafa öll bætt sig gríðarlega mikið hjá þeim.“
